Taulant Hoxha është emëruar Drejtor Ekzekutiv i KCSF-së në shtator 2018, pasi që më parë kishte shërbyer në pozita të ndryshme në organizatë nga viti 2007.

I diplomuar në Shkenca Politike, Taulanti ka qenë aktivist i shoqërisë civile për më shumë se dy dekada, i angazhuar në nisma e organizata të ndryshme në nivel lokal e qendror. Ka bërë programe studimi në Qendrën Europiane për të Drejtën Jo-për-përfitim – ECNL në Budapest në temën e Statusit për Përfitim Publik, si dhe në Universitetin e Qytetit të Nju Jorkut – CUNY në temën e filantropisë komunitare, me theks në filantropinë e diasporës. Gjithashtu, është pjesëmarrës i programeve të shumta të trajnimit në fushën e udhëheqësisë dhe menaxhimit, politikave të Bashkimit Europian, të drejtës jo-për-përfitim, zhvillimit të shoqërisë civile, etj. nga organizata e institucione të njohura vendore dhe ndërkombëtare.

Para angazhimit në KCSF ka shërbyer si konsulent për punë me rini në Këshillin e Europës ne vitet 2002-2004, si dhe Drejtor Ekzekutiv i parë i organizatës jo-qeveritare “Emancipimi Civil Ma Ndryshe” në periudhën 2006-2007. Gjithashtu, ka shërbyer si Kryetar i Shoqatës së Gjyqtarëve të Basketbollit të Kosovës gjatë viteve 2008-2009, ndërsa gjithashtu edhe si U.D. Udhëheqës i Sekretariatit të Platformës CiviKos në periudhën 2010-2011. Nga viti 2012 deri në vitin 2022 ka shërbyer si Udhëheqës i Bordit të Platformës CiviKos.

Ka publikuar dhjetëra studime e artikuj në vend dhe jashtë lidhur me shoqërinë civile, ndërsa ka marrë pjesë aktive e ka udhëhequr shumë nisma për mbrojtjen dhe përparimin e hapësirës qytetare e shoqërisë civile në Kosovë dhe rajon. Ndër të tjera, ka qenë pjesë e grupit të ekspertëve për hartimin e Matricës rajonale për monitorimin e ambientit për shoqëri civile, si dhe pjesë e ekipeve konsultuese të ekspertëve për hartimin e Udhëzuesit të BE-së për shoqërinë civile në vendet e zgjerimit 2014-2020, si dhe Udhëzuesit të Komisionit të Venedikut për lirinë e asocimit. Në Kosovë ka qenë pjesë aktive e dhjetëra grupeve punuese për hartimin e legjislacionit, politikave dhe strategjive që lidhen me punën e shoqërisë civile në Kosovë.

Nga viti 2020 shërben si zv. Udhëheqës i Bordit të Rrjetit Ballkanik për Zhvillim të Shoqërisë Civile (BCSDN).

Venera Hajrullahu e udhëhoqi KCSF-në për 13 vite, nga shkurti i vitit 2006 e deri në shtator të vitit 2018, periudhë kjo që shënoi një zhvillim të madh të organizatës

E diplomuar për Gjuhë dhe letërsi frënge në Universitetin e Prishtinës, Venera kreu studimet pas-diplomike në Institutin Europian të Universitetit të Gjenevës në Zvicër në fillim të viteve të 90-ta. Pas një periudhe të shkurtë të angazhimit profesional në Zvicër, u kthye në Kosovë dhe në vitet 1998-1999 u angazhua në Misionin Vëzhgues të OSBE-së në Kosovë. Vetëm disa muaj pas përfundimit të luftës në Kosovë në qershor 1999, ishte ndër personat kyç që ndihmuan në themelimin e transmetuesit publik, Radio Televizionit të Kosovës (RTK). Pas dy vitesh angazhimi në Fondacionin e Kosovës për Shoqëri të Hapur (KFOS) në programet e përkrahjes së administratës publike dhe qeverisjes lokale, nga viti 2004 drejtoi Zyrën për Integrim Europian të themeluar në kuadër të Zyrës së Kryeministrit të Kosovës duke kontribuar në  krijimin e strukturave e programeve fillestare për procesin e Integrimit europian të Kosovës. Gjithashtu, ishte Kryesuese e Grupit të ekspertëve për Reformën e Administratës Publike në vitet 2006-2007 ndërsa shërbeu edhe si Këshilltare e jashtme për Integrim europian e disa Kryeministrave, si dhe Presidentes Jahjaga.

Në shkurt 2007 pranoi detyrën e Drejtores Ekzekutive të KCSF-së, në një periudhë kur organizata ishte në një periudhë krize të thellë. Duke e vazhduar punën në misionin themeltar në zhvillimin e shoqërisë civile, Venera i’a shtoi punës së KCSF-së një perspektivë të veçantë të Integrimit europian, si reflektim i hapjes së perspektivës europiane të gjithë rajonit, përfshirë Kosovën. Me një angazhim të jashtëzakonshëm të saj dhe ekipit që krijoi, Venera arriti që jo vetëm ta nxirrte KCSF-në nga kriza, por shumë shpejt ta tejkalojë nivelin e zhvillimit të deriatëhershëm të organizatës. Paralelisht me themelimin e Shkollës për Integrim Europian dhe projekteve tjera të shumta të lidhura me BE-në, nën udhëheqjen e Venerës KCSF-në riktheu programet e saj të granteve për shoqëri civile në vitin 2009, ndërsa gjithashtu krijoi dhe zhvilloi njësitë e veçanta të hulumtimit, respektivisht Qendrën e KCSF-së për ngritje të kapaciteteve të shoqërisë civile. Përgjatë periudhës së udhëheqjes së saj, KCSF u shndërrua në njërën nga organizatat kryesore të shoqërisë civile në Kosovë dhe rajon, duke menaxhuar fondet për shoqëri civile të donatorëve kryesorë bilateral, duke avokuar suksesshëm në tema të shumta të hapësirës për veprim të shoqërisë civile në Kosovë dhe drejt institucioneve të BE-së në Bruksel, si dhe duke ngritur kapacitetet e qindra organizatave e aktivistëve të shoqërisë civile.

Pas largimit të saj në vitin 2018, si eksperte e pavarur është angazhuar në projekte, nisma e botime të shumta në Kosovë, rajon dhe më gjerë, në fushat e zhvillimit të shoqërisë civile, ndërtimit të institucioneve demokratike, Integrimit Europian, Reformës së administratës publike, si dhe bashkëpunimit rajonal.

Suzana Arni ka qenë pjesë e ekipit të KCSF-së për gati 23 vite, nga themelimi në 1998 e deri në pensionimin e saj në vitin 2021, ndërsa ka shërbyer si Drejtore Ekzekutive e KCSF-së në periudhën mars 2004 – shkurt 2006.

E diplomuar si inxhiniere e teknologjisë, Suzana që nga vitet e 70-ta kishte qenë e angazhuar në laboratorin e hulumtimit të materialeve ndërtimore, deri në largimin masiv nga puna të punëtorëve shqiptarë të Kosovës në vitin 1991, kur angazhohet në sektorin e shoqërisë civile.

Në vitin 1998 do të pranonte një donacion prej tre kompjuterësh, moment i cili do të shënonte themelimin e CeDeCis (Qendrës për Zhvillimin e Shoqërisë Civile), që më vonë do të shndërrohej në KCSF. Suzi, siç njihet nga kolegët e bashkëpunëtorët e shumtë, do të angazhohej në KCSF në departamente e role të ndryshme, nga Koordinatore e projekteve te Drejtore e programeve, nga pjesë e ekipit bërthamë të njësisë së granteve te Drejtore Ekzekutive.

Përderisa roli i saj në zhvillimin e KCSF-së ishte i gjithanshëm përgjatë 23 viteve të angazhimit të saj, Suzi dha kontribut vendimtar pikërisht në periudhën 2004-2006 kur edhe e udhëhoqi KCSF-në dhe siguroi mbijetesën e organizatës në një nga periudhat më të vështira për shkak të ndryshimit të modelit të financimit nga BE-ja, si donatori kryesor i deriatëhershëm.

Lulëzim Peci ishte Drejtor Ekzekutiv i KCSF-së në vitet 1999 – 2003, duke marrë udhëheqjen e organizatës në periudhën menjëherë pas përfundimit të luftës së Kosovës në qershor 1999.

Bashkë me Agon Demjahën dhe Steven Sampson, Lulëzimi ishte një nga tre personat që e regjistruan organizatën më 2 dhjetor 1999, ndërsa e udhëhoqi në fillimin e punës intenzive në përkrahje të sektorit jo-qeveritar. Ishtë kjo periudha kur OJQ-të u shndërruan në kanalin më të rëndësishëm vendor për përkrahjen ndërkombëtare për tejkalimin e emergjencës dhe rindërtimin, ndërsa KCSF u identifikua dhe u përkrah nga Bashkimi Europian si organizata kryesore vendore për t’i menaxhuar fondet e BE-së për shoqëri civile në Kosovë. Gjatë periudhës së udhëheqjes së tij, me ndihmën e BE-së KCSF kishte krijuar mekanizma të zhvilluara të ndarjes së granteve dhe kishte shpërndarë mbi 2 milionë euro nëpërmjet më shumë se 200 granteve për organizata jo-qeveritare në Kosovë. Gjithashtu, KCSF kishte filluar studimet dhe botimet e para rreth shoqërisë civile në Kosovë, programin e trajnimeve bazë për OJQ, si dhe shpërndarjen e mbi 400 bursave për nxënës e studentë të komunitetit Rom, Ashkali dhe Egjiptian.

Lulzimi u largua nga KCSF në nëntor të vitit 2003, kur udhëhoqi procesin e “spin-off” të një programi të KCSF-së, duke themeluar Institutin Kosovar për Hulumtim dhe Zhvillim të Politikave KIPRED dhe duke u bërë Drejtori Ekzekutiv i parë i KIPRED.

I diplomuar në Inxhinieri Elektrike në Universitetin e Prishtinës, Lulëzimi mban titullin MA në Marrëdhënie Ndërkombëtare nga Universiteti Institue Ortega y Gasset në Spanjë, si dhe titullin PhD në Shkenca Politike nga Universiteti i Europës Juglindore në Maqedoninë e Veriut.

Para angazhimit në KCSF, në vitet 1995-1998 ka shërbyer si Hulumtues në Qendrën e Kosovës për Studime Ndërkombëtare (KCIS), qendrë kjo që shërbente si ekip i politikës së jashtme pranë Zyrës së Presidentit të Kosovës Dr. Ibrahim Rugova. Gjatë viteve 2009-2013 ka shërbyer si Ambasador i Kosovës në Suedi, ndërsa ka shërbyer edhe si Anëtar i Bordit të Drejtorëve të Universitetit Amerikan në Kosovë, Ligjerues vizitor në Qendrën e Gjenevës për Politika të Sigurisë GCSP, ligjërues në lëndën e Sigurisë Kombëtare dhe Ndërkombëtare në Universitetin e Prizrenit, si dhe Kryesues i Bordit të Drejtorëve të Fondacionit të Kosovës për Shoqëri të Hapur KFOS. Ka botuar më shumë se 70 punime dhe artikuj në Kosovë, Britani të Madhe, Holandë, Greqi, Zvicër, Austri, Gjermani dhe Singapur.

Aktualisht është Drejtor Ekzekutiv në KIPRED, ndërsa vazhdon angazhimin hulumtues me fokus në politikat e sigurisë dhe të jashtme, marrëdhëniet ndër-etnike, si dhe partitë politike.  

Agon Demjaha ishte Drejtori Ekzekutiv i parë i Qendrës për Zhvillim të Shoqërisë Civile (CeDeCis) që më pas do të njihej si KCSF. Edhe pse qëndroi në këtë pozitë vetëm rreth një vit, ai udhëhoqi CeDeCis në procesin e themelimit si i deleguar nga Fondacioni i Kosovës për Shoqëri të Hapur, dhe pastaj në aktivitetet e para në vitin 1998 e deri në përfundimin e luftës në qershor të vitit 1999. Gjithashtu, bashkë me Lulzëim Pecin dhe Steven Sampson, ishte një nga tre personat që e regjistruan organizatën pas çlirimit, më 2 dhjetor 1999, tashmë me emrin Fondacioni Kosovar për Shoqëri Civile (KCSF).  

Agoni mbanë titullin MA në Marrëdhënie Ndërkombëtare dhe Studime Europiane, si dhe atë PhD në Shkenca Politike. Ka më shumë se katër dekada përvojë në fushën e mësimdhënies universitare, diplomacisë dhe sektorit jo-qeveritar. Gjatë kësaj periudhë ka botuar artikuj të shumë në fushën e shkencave politike në revista të ndryshme ndërkombëtare, ndërsa gjithashtu është autor i kapitujve të ndryshëm në libra të botuar nga shtëpi të njohura botuese si United Nations University Press, Imperial College Press dhe Palgrave Macmillan.

Gjatë viteve 2006-2010 ka shërbyer si Ambasador i Maqedonisë së Veriut në Suedi, periudhë gjatë së cilës ka mbuluar edhe Norvegjinë dhe Finlandën si ambasador jo-rezident. Në vitet 2010-2012 ishte angazhuar si këshilltar i Ministrit për Punë të Jashtme, si dhe Ministrit për Zhvillim Ekonomik në Qeverinë e Kosovës.

Aktualisht është i angazhuar si Profesor i Asociuar i Shkencave Politike dhe Marrëdhënieve Ndërkombëtare në Universitetin e Tetovës në Maqedoninë e Veriut, ndërsa vazhdon angazhimin në fushat e marrëdhënieve etnike, parandalimin dhe zgjidhjen e konfliktit, bashkëpunimin rajonal, si dhe diplomacisë.