Qendra e Burimeve për Shoqëri Civile në Kosovë organizon trajnimin e radhës mbi përdorimin e mjeteve digjitale në punën e Organizatave të Shoqërisë Civile (OShC).

Trajnimi “Përdorimi i mjeteve digjitale në punën e OShC-ve”, ka qëllim që të ofrojë informata praktike dhe të zhvilloj aftësitë e nevojshme në përdorimin e mjeteve dhe platformave digjitale, të disponueshme, me qëllim të përmirësimit të komunikimit, bashkëpunimit dhe rritjes së efikasitetit të përgjithshëm të punës së organizatave.

Kur mbahet trajnimi?

Datat: 24 dhe 25 shtator 2024, Prishtinë

Çfarë do të mësoni në këtë trajnim?

Ky trajnim do të fokusohet ndër të tjera në përdorimin e teknologjive digjitale më të përdorura në sektorin e OShC-ve, që do t’ju ndihmojnë në punën tuaj të përditshme, përfshirë: 

• Komunikimin e brendshëm, bashkëpunimin profesional, koordinimin dhe menaxhimin e projekteve;
• Organizimin dhe mbajtjen e ngjarjeve online (seminare, trajnime, konferenca, etj.);
• Arritjen deri tek audiencat e synuara duke promovuar më mirë profilin dhe portofolin e punës së organizatës;
• Forcimin e transparencës;
• Nxitjen e inovacionit;
• Mundësitë për zhvillim të vazhdueshëm të punonjësve dhe kulturës organizative.

Çfarë përfitoni nga pjesëmarrja në këtë trajnim?

Duke marrë pjesë në këtë trajnim, ju do të:

• Njiheni me mjetet dhe platformat digjitale të disponueshme për përdorim në punën e OShC-ve.
• Mësoni se si t’i përdorni këto mjete dhe platforma në mënyrë efektive për të rritur efikasitetin e punës dhe për të arritur objektivat e organizatës suaj.
• Angazhoheni në mundësitë e rrjetëzimit me përfaqësues të tjerë të OShC-ve dhe shkëmbeni praktikat më të mira.
• Përfitoni nga përvoja praktike përmes demonstrimeve për përdorimin e disa nga mjetet e diskutuara gjatë trajnimit.

Kush mund të aplikojë dhe cilat janë kriteret e aplikimit?

Të drejtë aplikimi kanë organizatat e shoqërisë civile, të cilat kanë interesim për të mësuar rreth përdorimit të mjeteve digjitale në punën e organizatave të tyre.

Secila OShC duhet të propozojë 1 anëtar/e për të marrë pjesë në trajnim bazuar në përgjegjësitë e tyre brenda organizatës.

Kriteret e aplikimit:

• Të jetë Organizatë e Shoqërisë Civile (OShC), e regjistruar në Kosovë;
• Veprimtaria e OShC-së të përfshijë edhe punën në nivel lokal;
• Të kenë aktivitet në komunitet dhe/ose interesim për përfshirje të qytetarëve/eve në punën e organizatës.

Si të aplikoni?

Për të marrë pjesë në trajnim, ju ftojmë të regjistroheni përmes formës së aplikimit, të cilën mund ta gjeni duke klikuar në vegëzën në vijim: Formulari i aplikimit.

Ju lusim që formularin e aplikimit ta plotësoni më së largu deri me datën 12 shtator 2024, ora 14:00.

Për informata tjera, ju lutem kontaktoni ekipin tonë në adresën elektronike rc-kosovo@kcsfoundation.org ose përmes telefonit në numrin: 038 600 634.

Qendra e Burimeve për Shoqëri Civile në Kosovë, është projekt i cili bashkë-financohet nga Bashkimi Evropian dhe Suedia dhe zbatohet nga Fondacioni Kosovar për Shoqëri Civile (KCSF) dhe Community Building Mitrovica (CBM).